कलैया, वैशाख २६ : कलैया उपमहानगरपालिका वडा नं. २५ अन्तर्गत सिसहनिया टोलमा स्थानीय बासिन्दाको सक्रिय सहभागितामा टोल सुधार समिति गठन गरिएको छ। मिति २०८३ वैशाख २६ गते सम्पन्न भेलाले टोलको विकास, सरसफाइ, सामाजिक एकता तथा जनचेतनामूलक कार्यक्रम सञ्चालन गर्ने उद्देश्यसहित समिति गठन गरेको हो।
सामाजिक अभियन्ता हिरामती आर्याको अध्यक्षतामा सम्पन्न भेलाबाट नवगठित समितिको अध्यक्षमा राज प्रसाद गुप्ता चयन हुनुभएको छ। भेलामा स्थानीय युवा, महिला र बुद्धिजीवी तथा सर्वसाधारणको उल्लेख्य सहभागिता रहेको थियो।
कार्यक्रमलाई सम्बोधन गर्दै सामाजिक अभियन्ता कुश्वाहाले टोलको समग्र विकासका लागि स्थानीय वासी बीच सहकार्य, एकता तथा सक्रिय सहभागिता आवश्यक रहेको बताउनु भयो। उहाँले समाजमा रहेका विभिन्न समस्या समाधानका लागि टोल स्तरबाटै जनचेतना अभिवृद्धि गर्दै सामूहिक प्रयास गर्नुपर्नेमा जोड दिनुभयो।
नवनिर्वाचित अध्यक्ष गुप्ताले सुशासन, पारदर्शिता, सुरक्षा, वातावरण संरक्षण तथा सामाजिक कार्यमा समिति सक्रिय रूपमा लाग्ने प्रतिबद्धता व्यक्त गर्नुभयो। उहाँले टोलमा रहेका विभिन्न समस्या तथा जनचासोका विषयमा आवाज उठाउँदै समाधानका लागि आवश्यक पहल गरिने बताउनुभयो।
नवगठित समितिले आगामी दिनमा टोलको शान्ति, सुरक्षा, सरसफाइ, वातावरण संरक्षण तथा सामाजिक एकता कायम गर्न विभिन्न जनचेतनामूलक तथा विकासमुखी कार्यक्रम सञ्चालन गर्ने जनाएको छ।
